Oktubre 21, 2025 | Kapistahan ni San Pedro Calungsod, Martir

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Juan 12, 24-26

Ang Mabuting Balita ng Panginoon ayon kay San Juan

Noong panahong iyon, sinabi ni Hesus sa kanyang mga alagad: “Tandaan ninyo: malibang mahulog sa lupa ang butil ng trigo at mamatay, mananatili itong nag-iisa. Ngunit kung mamatay, ito’y mamumunga nang marami. Ang taong labis na nagpapahalaga sa kanyang buhay ay siyang mawawalan nito, ngunit ang napopoot sa kanyang buhay sa daigdig na ito ay siyang magkakaroon nito hanggang sa buhay na walang hanggan. Dapat sumunod sa akin ang naglilingkod sa akin, at saanman ako naroroon ay naroon din ang aking lingkod. Pararangalan ng Ama ang sinumang naglilingkod sa akin.”

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘

Nakahanda na ba tayo sa pagparito ng ating Panginoon? Kung tayo ay madatnan ng Diyos na nagluluto, o naghuhugas ng plato, o nagtatrabaho, madaratnan ba Niya tayong karapat-dapat isama sa Kanyang Kaharian? Ito ang paalala sa atin ng Ebanghelyo ngayon at ng ginugunita natin na santo na si San Pedro Calungsod. Dumapo sa kanya ang kamatayan ng paslangin siya ng isang katutubo. May pagkakataon siyang tumakbo para iligtas ang sarili ngunit nanatili siyang kasama ang Pari na kanyang pinagsisilbihan. Kaya naman kahit naglaho ang kanyang bangkay na itinapon sa dagat ay inaalala naman natin ngayon ang kanyang pananampalataya.

Mga kapanalig, anuman ang ating ginagawa, gaano kaliit o kasimple, palagi natin alalahanin ang Diyos. Sa mga simpleng tagpo ng ating buhay, sa ating paglalakad, sa pagsakay sa sasakyan, sa pagsasaing ng kanin, alalahanin natin ang Panginoon. Kausapin natin Siya na parang kaibigan at bigyan ng pagkakataon ang sarili na pakinggan ang Kanyang mensahe sa atin. Nawa’y maisagawa natin ang mulat na kamalayan sa presensya ng Diyos. Sa Ngalan ng Diyos Ama, Anak at Espiritu Santo. Amen.+

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com

Oktubre 20, 2025 |Paggunita kay San Pablo de la Cruz, pari

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Lucas 12, 13-21

Ang Mabuting Balita ng Panginoon ayon kay San Lucas

Noong panahong iyon, sinabi kay Hesus ng isa sa mga tao, “Guro, iutos nga po ninyo sa kapatid ko na ibigay sa akin ang bahagi ko sa aming mana.” Sumagot siya “Ginoo, sino ang naglagay sa akin bilang hukom o tagapaghati ng mana ninyo?” At sinabi niya sa kanilang lahat: “Mag-ingat kayo sa lahat ng uri ng kasakiman; sapagkat ang buhay ng tao ay wala sa laki ng kayamanan.” At pagkatapos ay isinaysay ni Hesus ang talinhagang ito: “Ang bukirin ng isang mayaman ay umani nang sagana. Kaya’t nasabi niya sa sarili, ‘Ano ang gagawin ko? Wala na akong paglagyan ng aking ani! A, gigibain ko ang aking mga kamalig, at magtatayo ako ng lalong mas malalaki. Doon ko ilalagay ang aking ani at ari-arian. At sasabihin ko sa aking sarili, Ayan, marami na akong ari-arian! Hindi na ako kukulangin habambuhay! Kaya’t mamamahinga na lang ako, kakain, iinom, at magsasaya!’ Ngunit sinabi sa kanya ng Diyos, ‘Hangal! Sa gabing ito’y babawian ka ng buhay. Kanino mapupunta ang mga bagay na inihanda mo?’ Ganyan ang sasapitin ng nagtitipon ng kayamanan para sa sarili, ngunit dukha naman sa paningin ng Diyos.”

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘

Sa Ebanghelyo ay nakita natin na hindi namagitan si Hesus sa hatian ng mana ng dalawang magkapatid. Nakita ng ating Panginoon na hindi simpleng hatian ng lupa ang sinasangguni ng lalaki sa kanya kundi ang pagtatapos ng koneksyon at relasyon nila ng kanyang kapatid kapag nahati na ang kanilang mana. Ano ang mga bagay na hinihiling natin sa Diyos na akala natin ay walang epekto sa ating kapwa? Sa Ebanghelyo rin ay nasaksihan natin ang isang mayaman na lalaki. Mas pinili niya ang mag-imbak ng kayamanan kaysa ang ibahagi ito sa kapwa upang lumago ang kanyang relasyon sa mga kapamilya, kaibigan at kapit-bahay.

Marapat na makita natin kung tuwing kailan nagiging sentro ang ating sarili. Upang hindi natin makalimutan na tignan ang ating paligid. Upang masumpungan natin ang nangangailangan at makita kung saan tayo tinatawag ng Diyos na magparanas ng awa at pagmamahal sa ating kapwa. Ito ang hamon sa atin, ang makita sa ating ordinaryong buhay kung kailan nababalewala na natin ang mahal sa buhay dahil abala tayo sa ating pagpapahalaga sa sarili. Magbahagi tayo ng biyaya sa kapwa na siyang nagmula naman sa Diyos. Sa Ngalan ng Diyos Ama, Anak at Espiritu Santo. Amen.+

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Lucas 18, 1-8

Ang Mabuting Balita ng Panginoon ayon kay San Lucas

Noong panahong iyon, isinaysay ni Hesus ang isang talinghaga upang ituro sa mga alagad na dapat silang manalanging lagi at huwag manghinawa. “Sa isang lungsod,” wika niya, “may isang hukom na hindi natatakot sa Diyos at walang taong iginagalang. Sa lungsod ding iyon ay may isang babaing balo na punta nang punta sa hukom at humihingi ng katarungan. Tinanggihan siya ng hukom sa loob ng ilang panahon. Ngunit nang malaunan ay nasabi nito sa sarili: ‘Bagamat hindi ako natatakot sa Diyos ni gumagalang kaninuman, igagawad ko na ang katarungang hinihingi ng babaing ito sapagkat lagi niya akong ginagambala — baka pa ako mainis sa kapaparito niya.’ At sinabi ng Panginoon, “Narinig ninyo ang sinabi ng masamang hukom. Hindi ipagkakait ng Diyos ang katarungan sa kanyang mga hinirang na dumaraing sa kanya araw-gabi, bagamat tila nagtatagal iyon. Sinasabi ko sa inyo, agad niyang igagawad sa kanila ang katarungan. Ngunit pagdating ng Anak ng Tao sa daigdig na ito, may makikita kaya siyang mga taong nananalig sa kanya?”

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘

“PANALANGIN SA DIYOS”
Oktubre 19, 2025. Ika-29 na Linggo sa Karaniwang Panahon.
Pagninilay:
Kung mayroon tayong hinihiling sa Panginoon, kailangan din natin ng kabukasan ng loob. Hindi laging may sagot at hindi laging matutupad ang eksaktong panalangin ngunit mayroong inihahanda at sagot ang Diyos sa atin kung handa lamang tayong makinig at tanggapin iyon. Maging matiyaga tayo sa ating pananalangin. Lagyan natin ito ng kahit kaunting pananalig. Kahit kaunting pananalig lang ang mayroon tayo ay daragdagan ito ng Diyos kung hihilingin natin sa Kanya. Siya rin ang tutulong sa atin na huwag sumukong manalangin at manalig sa Kanya sapagkat kung tayo lamang ay madali tayong mapanghinaan ng loob. Nariyan ang mga duda, takot at kaba subalit kahit pa minsan ay nananaig ang mga ito sa atin, higit pa ring makapangyarihan ang Diyos sa lahat ng iyan. Kung mahal natin ang Diyos, sisikapin nating magtiwala sa Kanya at gugustuhin nating labanan ang mga ito kahit mahirap. Lalo tayong sinusubok at lalong abala ay mas kailangan ng pananalangin. Kaya nga ang patuloy na pananalangin ang makakapagpalinis sa atin. Habang nagpupursigi tayo sa pagdarasal, binabago ng Diyos ang ating puso. Ginagawa Niya itong mas payapa, tahimik at mas tulad ng Kanya. Minsan kahit mararamdaman nating tila walang nangyayari sa panalangin, mayroon. Mayroon Siyang ginagawa sa atin na hindi natin nakikita. Nawa ay magpatuloy tayo at buksan natin ang ating mga puso at isipan para sabihin ang ating nararamdaman at iniisip sa Diyos. Ito ay sapat nang panalangin kung hindi natin alam paano magsisimula. Amen. +

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Lucas 10, 1-9

Ang Mabuting Balita ng Panginoon ayon kay San Lucas

Noong panahong iyon, ang Panginoon ay humirang ng pitumpu’t dalawa. Pinauna niya sila nang dala-dalawa sa bawat bayan at pook na patutunguhan niya. Sinabi niya sa kanila, “Sagana ang aanihin, ngunit kakaunti ang mga manggagawa. Idalangin ninyo sa may-ari na magpadala siya ng mga manggagawa sa kanyang bukirin. Humayo kayo! Sinusugo ko kayong parang mga kordero sa gitna ng mga asong-gubat. Huwag kayong magdala ng lukbutan, supot, o panyapak. Huwag na kayong titigil sa daan upang makipagbatian kaninuman. Pagpasok ninyo sa alinmang bahay, sabihin muna ninyo, ‘Maghari nawa ang kapayapaan sa bahay na ito!’ Kung maibigin sa kapayapaan ang nakatira roon, sasakanila ang kapayapaan; ngunit kung hindi, hindi sila magkakamit nito. Manatili kayo sa bahay na inyong tinutuluyan; kanin ninyo at inumin ang anumang idulot sa inyo – sapagkat ang manggagawa ay may karapatang tumanggap ng kanyang upa. Huwag kayong magpapalipat-lipat ng bahay. Kapag tinanggap kayo sa alinmang bayan, kanin ninyo ang anumang ihain sa inyo; pagalingin ninyo ang mga maysakit doon at sabihin sa bayan, ‘Nalalapit na ang paghahari ng Diyos sa inyo.’”

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘
Ang misyon natin ay inilaan ng Diyos. Kung kaya’t mahalaga na maging malinaw sa kung para kanino natin ginagawa ang bawat kabutihan sa ating buhay, iyon ay para mas mapalapit tayo sa ating Panginoong HesuKristo. Ang Diyos ang simula ng lahat at Diyos din ang hangganan. Nagkakaroon ng kabuluhan ang buhay ng tao kung nagiging malinaw sa kanya ang katotohanan na ito. Sa pamamagitan ng pagiging mulat na Diyos ang dapat natin patunguhan, nakakatulong ito na makita natin ang hindi kaloob ng Diyos. Ang kawalan ng kapayapaan kahit gaano pa kaganda ang ating ginagawa ay isang senyales na dapat tayong manalangin at tumingala sa Krus ng ating Panginoon. Ipanalangin natin palagi na ayusin Niya ang direksyon ng ating mga puso. Upang sa gitna ng takot ay magawa natin ang tama. Upang sa gitna ng tagumpay ay mapansin natin kung may nangyayari na bang mali. Magiging mapagmatyag tayo kung malinaw sa atin ang katotohanan na ito. Gaano man kaganda ang ating mga gawain, nawawalan ito ng halaga kapag hindi kapiling ang Diyos.

Mga kapanalig, parati natin sabihin sa sarili na kasama natin ang Diyos at mahal Niya tayo. Ito ay katotohanan na hindi mababago. At bilang sukli sa pagmamahal at mga sakripisyo ni Kristo, gawin natin ang tama. Kung tayo naman ay nalilito ay isipin natin na nariyan ang Banal na Espiritu Santo. Imbitahan natin Siya sa panalangin upang bigyan tayo ng inspirasyon na nagmumula sa karunungan ng Maylika ng lahat. Nawa’y manatili sa atin ang mga katotohanan na ito. Sa Ngalan ng Diyos Ama, Anak at Espiritu Santo. Amen.+

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com

Oktubre 17, 2025 | Biyernes ng Ika-28 Linggo sa Karaniwang Panahon (I)
Paggunita kay San Ignacio ng Antioquia, obispo at martir

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Lucas 12, 1-7

Ang Mabuting Balita ng Panginoon ayon kay San Lucas

Noong panahong iyon, samantalang dumaragsa ang libu-libong tao, anupat nagkakatapakan sila, nagsalita muna si Hesus sa kanyang mga alagad, “Mag-ingat kayo sa lebadura ng mga Pariseo – ito’y ang pagpapaimbabaw. Walang natatago na di malalantad, at walang nalilihim na di mabubunyag. Anumang sabihin ninyo sa dilim ay maririnig sa liwanag at anumang ibulong ninyo sa mga silid ay ipagsisigawan.

“Sinabi ko sa inyo, mga kaibigan, huwag ninyong katakutan ang mga pumapatay ng katawan, at pagkatapos ay wala nang magagawa pa. Sasabihin ko sa inyo kung sino ang dapat ninyong katakutan: katakutan ninyo yaong pagkatapos na pumatay ay may kapangyarihan pang magbulid sa impiyerno. Sinasabi ko sa inyo, ang Diyos ang dapat ninyong katakutan!

Hindi ba ipinagbibili sa halagang dalawang pera lamang ang limang maya? Gayunman, kahit isa sa kanila’y hindi pinababayaan ng Diyos. Maging ang buhok ninyo’y bilang na lahat. Kaya, huwag kayong matakot; higit kayong mahalaga kaysa mga maya.”

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘

Mapagpalang Paggunita kay San Ignacio ng Antioquia! Klaro ang mensahe ng ating Panginoon. Walang lihim ang hindi mabubunyag at walang natatago ang hindi mailalantad. Walang sikreto sa perspektibo ng Diyos at nakikita Niya ang nilalaman ng ating mga puso. Ito ang dahilan kung bakit sinabi ni HesuKristo na iwasan natin ang halimbawa ng pagpapaimbabaw, o “hypocrisy” sa Ingles, ng mga Pariseo na pinapamukha nilang banal sila sa panlabas ngunit puno ng kasalanan sa panloob. Ang kailangan natin ay pananampalataya, hindi pagpapaimbabaw. Dahil dito, tayo ay pinapaalalahan ng Diyos na iwasan rin ang kasalanan, lalo na ang pagsisinungaling. Isa sa mga tukso ng demonyo ay ang ipakita ang benepisyo na makukuha sa pagsisinungaling na tila ba, hindi nakikita ng iba ang ang totoo. Ganoon din, nawa’y iwasan din natin ang mga trabaho na nagpapalayo sa atin sa Diyos at ipagdasal ang mga tao na nasa iligal na kalakaran sapagkat sila ay rin ay nararapat na makita ang kaligtasan mula sa Diyos. Ang mensahe ni Kristo patungkol sa mga Pariseo ay hindi nangangahulugang hindi importante ang mabuting gawa. Sa halip, ang pananampalataya ay dapat nakikita, hindi lamang sa ating salita o gawa, kundi ito rin ay nasa ating puso. Isang modelo na maaari nating tingnan ay si San Ignacio ng Antioquia. Siya ay isang obispo at naabutan niya ang mga Apostol. Isa rin siyang martir sapagkat pinapatay ng mga emperador noon ang mga Kristiyano dahil sa kanilang pananampalataya. Ang sabi ni San Ignacio, hindi niya tatalikuran ang kanyang paniniwala sapagkat si Kristo na ipinako sa Krus ay nasa loob ng kanyang puso. Para kay San Ignacio, mas mahalaga ang ating Panginoong Hesus kaysa sa lahat ng ligaya na maibibigay ng mundo. Sana ay maging ganito rin ang ating pananaw sa buhay. Ang ating pananampalataya ay hindi lalago kung wala tayong ginagawa tungkol dito. Sa halip, napakahalaga na bigyan natin ng maraming oras ang panalangin, kasama na ang iba’t ibang debosyon tulad ng “Divine Mercy Chaplet.” Sa debosyong ito, mapagninilayan natin ang Awa na ipinakita ni Kristo sa atin sa Kanyang sakripisyo. Kapag ibibigay natin ang ating oras sa mga debosyon, mapapalalim ang ating relasyon sa Diyos at matatanggap paunti-unti ang natitirang pagpapaimbabaw sa atin kung malinis ang ating intensyon. Magtiwala tayo sa Diyos at matatanggap natin ang Kanyang tulong upang tayo ay madala sa walang hanggang kaluwalhatian ng Diyos. Amen. +

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com

Oktubre 16, 2025 | Huwebes ng Ika-28 Linggo sa Karaniwang Panahon (I)
o kaya Paggunita kay San Eduvigis (Heidi), namanata sa Diyos
o kaya Paggunita kay Santa Margarita Maria Alacoque, dalaga

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Lucas 11, 47-54

Ang Mabuting Balita ng Panginoon ayon kay San Lucas

Noong panahong iyon, sinabi ni Hesus, “Kawawa kayo! Ipinagtatayo ninyo ng magagarang libingan ang mga propetang pinagpapatay ng inyong mga magulang. Sa ganitong paraan, kayo na rin ang nagpapatunay na sang-ayon kayo sa mga ginawa ng inyong mga magulang; sapagkat sila ang pumatay sa mga propeta at kayo naman ang nagtatayo ng libingang puntod ng mga yaon. Dahil dito’y sinabi rin ng Karunungan ng Diyos, ‘Magsusugo ako sa kanila ng mga propeta at ng mga apostol; ang iba’y papatayin nila at uusigin ang iba.’ Sa gayo’y lalagpak sa lahing ito ang parusa dahil sa pagpatay sa mga propeta buhat nang itatag ang sanlibutan, magmula kay Abel hanggang kay Zacarias na pinatay sa pagitan ng dambanang sunugan ng mga handog at ng gusali ng Templo. Sinasabi ko sa inyo, lalagpak sa lahing ito ang parusa dahil sa kanilang ginawa.

“Kawawa kayo, mga dalubhasa sa Kautusan! Sapagkat inalis ninyo ang susi ng karunungan. Ayaw na ninyong magsipasok, hinahadlangan pa ninyo ang mga nagnanais pumasok.”

At umalis si Hesus sa bahay na iyon. Mula noon, tinuligsa na siya ng mga eskriba at ng mga Pariseo at pinagtatatanong tungkol sa maraming bagay, upang masilo siya sa kanyang pananalita.

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘

Mapagpalang Paggunita kay Santa Margarita Maria Alacoque! Sa ating Mabuting Balita, makikita natin ang mga sinabi ng ating Panginoong Hesus sa mga Pariseo. Ibinanggit Niya ang kasalanan ng mga Hudyo na pinatay ang mga propeta ng Diyos sapagkat ayaw nila sa mensahe ng Panginoon. Ganoon din, alam ni HesuKristo ang nasa puso ng mga Pariseo. Sa kabila ng pagbabahagi ng Mabuting Balita ng Panginoon, ayaw nilang makinig. Sa halip, nagpapanggap sila. Ninanais nila kilalanin sila ng tao ngunit hinaharangan nila ang mga kapwa para mapalalim ang kanilang relasyon sa Diyos. Hindi lamang iyon. Alam ni Kristo na ninanais din ng mga Pariseo na ipapatay Siya. Ito ang dahilan kung bakit mababasa natin sa dulo ng Ebanghelyo na nagsimula na ang mga Pariseo at mga eskriba na tuligsain Siya. Ito ang simula ng kanilang plano para ipapatay ang ating Tagapagligtas. Ngunit, mahalaga rin na makita ang awa at habag ng Diyos sa kanila.

Matagal na panahon ang hinintay ng mga Pariseo bago nila maipako si HesuKristo. Ngunit, sa mahabang panahon na iyon, sila ay binibigyan ng pagkakataon ng Diyos na magbago. Sila ay binibigyan ng pagkakataon na magsisi sa kanilang mga kasalanan. Ginamit nila ang kalayaan para hindi hindi makinig sa kanilang konsensya. Tayo rin, alam ng Kristo ang ating mga kasalanan. Hindi totoo na wala tayong pagbabago. Sa halip, lahat ng oras na mayroon tayo ay upang tayo ay bumalik palagi sa ating Diyos. Ito ang tinuturo ni Santa Margarita Maria Alacoque na nagpalaganap ng debosyon sa Sagradong Puso ng ating Panginoon. Sa Puso ni Hesus nagmumula ang grasya ng pagbabago at kaligtasan. Nawa’y tanggapin natin ang biyayang ito mula sa Sagradong Puso ni Kristo. Lumapit din tayo dito at tandaan natin na makikita natin ang Sagradong Puso ng ating Panginoon sa Banal na Eukaristiya. Magsisi tayo habang tayo ay pumupunta sa Misa. Hindi lamang iyon. Puntahan natin ang Sagradong Puso ni Hesus sa “Adoration Chapel.” Sambahin natin ang Kanyang Puso. Purihin natin ang Kanyang Puso. Mahalin natin ang Kanyang Puso. Amen. +

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com

Oktubre 15, 2025 | Paggunita kay Santa Teresa ng Avila, dalaga at pantas ng Simbahan

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Lucas 11, 42-46

Ang Mabuting Balita ng Panginoon ayon kay San Lucas

Noong panahong iyon, sinabi ni Hesus, “Kawawa kayo, mga Pariseo! Ibinibigay niyo ang ikapu ng yerbabuena, ng ruda, at ng iba pang gulayin, ngunit kinaliligtaan ninyo ang katarungan at ang pag-ibig sa Diyos. Tamang gawin ninyo ito ngunit huwag naman ninyo kaliligtaang gawin ang mga iba.

“Kawawa kayo, mga Pariseo! Sapagkat ang ibig ninyo’y ang mga tanging luklukan sa mga sinagoga, at ang pagpugayan kayo sa mga liwasang bayan. Sa aba ninyo! Sapagkat para kayong mga libingang walang tanda, at nalalakaran ng mga tao nang hindi nila nalalaman.”

Sinabi sa kanya ng isa sa mga dalubhasa sa Kautusan, “Guro, sa sinabi mong iyan pati kami’y kinukutya mo.” At sinagot siya ni Hesus, “Kawawa rin kayo mga dalubhasa sa Kautusan! Sapagkat ipinapapasan ninyo sa mga tao ang mabibigat na dalahin, ngunit ni daliri’y ayaw ninyong igalaw sa pagdadala ng mga iyon.”

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘

Ang Mabuting Balita ngayon ay paalala ni Hesus sa mga Pariseo at mga dalubhasa sa Kautusan na huwag maging mapagkunwari sa pananampalataya. Madalas kasi silang nagpapakita ng kabanalan sa labas, ngunit nakalilimutan nila ang tunay na diwa ng pagmamahal at katarungan. Ipinapakita ni Hesus na ang pagsunod sa Diyos ay hindi lamang nasusukat sa mga ritwal o panlabas na gawain, kundi sa kabutihan ng puso at sa pagmamalasakit sa kapwa.

Tinutuligsa ni Hesus ang mga taong inuuna ang papuri at pagkilala ng iba, kaysa ang paggawa ng mabuti at makatarungan. Maraming tao rin ngayon ang tulad ng mga Pariseo. Maraming tao ang mas pinahahalagahan ang imahe kaysa sa kababaang-loob. Ang paalalang ito ni Hesus ay nagtuturo sa atin na suriin ang ating sarili. Ginagawa ba natin ang kabutihan dahil sa pag-ibig sa Diyos, o dahil gusto lamang nating mapuri ng tao?

Ang tunay na pananampalataya ay nakikita sa gawa, hindi sa salita. Ang pag-ibig at katarungan ay dapat laging magkasama, sapagkat iyan ang kalooban ng Diyos. Kung tunay nating mahal ang Diyos, dapat itong makita sa ating malasakit, kabutihan, at pagiging patas sa kapwa. Ang yunay na pagtulong ay walang inaasahang kapalit o papuri mula sa iba.

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com

Oktubre 14, 2025 | Martes ng Ika-28 Linggo sa Karaniwang Panahon (I)
o kaya Paggunita kay San Calixto I, papa at martir

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Lucas 11, 37-41

Ang Mabuting Balita ng Panginoon ayon kay San Lucas

Noong panahong iyon, pagkatapos magsalita ni Hesus, siya’y inanyayahan ng isang Pariseo upang kumain, kaya’t pumunta siya sa bahay nito. Pagdulog sa hapag, nagtaka ang Pariseo nang makita niyang kumain si Hesus nang hindi muna naghugas ng kamay. Sinabi sa kanya ng Panginoon, “Kayong mga Pariseo, hinuhugasan ninyo ang labas ng tasa at ng pinggan, ngunit ang loob ninyo’y punong-puno ng kasakiman at kasamaan. Mga hangal! Hindi ba’t ang may likha ng labas ang siya ring may likha ng loob? Ngunit ipamahagi muna ninyo sa mga dukha ang mga laman ng mga sisidlan at magiging malinis ang lahat ng bagay para sa inyo.”

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘

Maraming magagandang hangarin. Ngunit anumang ganda ng misyon, kung hindi kasama ang Diyos ay mawawalan din ng halaga at proteksyon. Marahil naranasan natin ang mapunta sa gitna ng mahirap na sitwasyon. Marahil may nagtutulak sa atin ng boses na kumilos ng mabilis at gamitin ang sariling kakayahan para maresolba ang mga dapat maayos. Ngunit, kung kikilos tayo ayon lamang sa ating pang-unawa, kung kikilos tayo ayon sa dikta ng kalungkutan o takot, baka mabingi tayo at makalimutan ang tinig ng Diyos. Kailangan natin matutuhan na makita ang paggalaw ng Diyos kahit pa sa mga hindi kaaya-aya na sitwasyon. Kung naghihintay tayo sa pagdating ng biyaya sa ating buhay, pagnilayan natin ang halaga ng paghihintay, maaaring kaya ito nangyayari ay upang humaba ang ating pasensya. Nang sa gayun, sa pagdating ng biyaya ay mapagpasensya natin itong mapangatawanan at mapangalagaan.

Mga kapanalig, huwag natin piliin ang madali sa lahat ng oras. Huwag tayong gumaya sa mga Pariseo na hinahayaan munang magdusa ang mga dukha upang hindi sila lubos na maghirap. Pinadadali nila ang mga bagay para sa kanilang mga sarili ngunit sinasamantala naman nila ang kahinaan ng kanilang kapwa. Nawa’y ang ating pagkilos ay agapayan ng malinis na kalooban. Sa Ngalan ng Diyos Ama, Anak at Espiritu Santo. Amen.+

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com

Oktubre 13, 2025 | Lunes ng Ika-28 Linggo sa Karaniwang Panahon (I)

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Lucas 11, 29-32

Ang Mabuting Balita ng Panginoon ayon kay San Lucas

Noong panahong iyon, samantalang dumaragsa ang mga tao, sinabi ni Hesus, “Napakasama ng lahing ito! Naghahanap sila ng palatandaan mula sa langit, subalit walang ipapakita sa kanila maliban sa palatandaang inilalarawan ng nangyari kay Jonas. Kung paanong naging isang palatandaan si Jonas sa mga taga-Ninive, gayun din naman, magiging isang palatandaan sa lahing ito ang Anak ng Tao. Sa Araw ng Paghuhukom, titindig ang Reyna ng Timog laban sa lahing ito at sila’y hahatulan niya ng kaparusahan. Sapagkat nanggaling siya sa dulo ng daigdig upang pakinggan ang karunungan ni Solomon; ngunit higit na di-hamak kay Solomon ang naririto! Sa Araw ng Paghuhukom ay titindig ang mga taga-Ninive laban sa lahing ito at hahatulan ng kaparusahan, sapagkat nagsisi sila dahil sa pangangaral ni Jonas; ngunit higit na di-hamak kay Jonas ang naririto!”

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘

Ano ang nais ng Panginoon para sa ating lahi? Nais ng Panginoon na pagsikapan natin na mapalapit sa Kanya at mas pagkatiwalaan Siya, higit pa sa anumang uri ng kapangyarihan na nagpapanggap sa mundo. Sapagka’t lahat ng kalakasan ay nagmula sa Diyos. Bilang mga Krisityano, inaasahan ng Diyos na maunawaan natin na kaya Niya ipinadala ang Bugtong na Anak na si Hesus bilang ating tagapagligtas ay upang tubusin tayo sa ating mga kasalanan. Ngunit hindi rito natatapos ang ating paglalakbay. Sinabi sa atin ni Hesus, “Pasanin ninyo ang aking pamatok, at magaral kayo sa akin; sapagka’t ako’y maamo at mapagpakumbabang puso: at masusumpungan ninyo ang kapahingahan ng inyong mga kaluluwa. Sapagka’t malambot ang aking pamatok, at magaan ang aking pasan.”

Nasa mundo tayo na puno ng pagsubok. Kaya tayo nakakaranas ng mga paghihirap ay dahil wala pa tayo sa Langit. Doon ang tunay nating kapahingahan. Ngunit, inaalok tayo ni Hesus na maging tapat sa mga pangaral Niya. Kung susundin natin ang Kanyang mga turo at mga ipinapangaral, na ipinasa ng mga Apostol sa Inang Simbahan, makakatiyak tayo na anumang pagsubok ang dumating ay magiging magaan. Sapagka’t ang kapayapaan na mula sa Diyos ay may kakayahan na manatili sa ating mga puso at kaluluwa, basta’t susundin natin ang mga yapak ni HesuKristo. Wala na tayong dapat na pagdudahan pa. Siya na nagpapako sa Krus, Siya na Muling Nabuhay, at Siya na Umakyat sa Langit, ay babalik sa pagdating ng panahon. Nawa’y madatnan tayo ni Hesus na naging tapat at kumikilos sa Ngalan ng Kanyang habag at pag-ibig sa sangkatauhan. Tularan natin ang Bugtong na Anak ng Diyos. Sa Ngalan ng Ama, Anak at Espiritu Santo. Amen.+

Pagninilay ni TKRS

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Mateo 8, 23-27

Ang Mabuting Balita ng Panginoon ayon kay San Mateo

Noong panahong iyon, sumakay si Hesus sa bangka, kasama ang kanyang mga alagad. Bumugso sa lawa ang isang malakas na unos at halos matabunan ng mga alon ang bangka. Ngunit natutulog noon si Hesus. Kaya’t nilapitan siya ng mga alagad at ginising. “Panginoon, tulungan ninyo kami!” sabi nila. “Lulubog tayo!” At sinabi niya sa kanila, “Ano’t kayo’y natatakot? Napakaliit naman ng pananalig ninyo!” Bumangon siya, sinaway ang hangin at ang dagat, at tumahimik ang mga ito. Namangha silang lahat at ang sabi, “Anong tao ito? Kahit ang hangin at ang dagat ay tumatalima sa kanya!”

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘
Mapagpalang Lunes mga kapatid kay Kristo. Nahihirapan ba tayong umusad sa susunod na hakbang sa ating buhay? Sa Ebanghelyo ay iniimbitahan tayo ng Panignoong HesuKristo na manalig sa Kanyang kapangyarihan. Kapag tayo ay dinadala tayo sa mga pagbabago ay kumapit tayo sa Diyos. Siya ang ating magiging lakas at sandigan basta't susundin natin ang kalooban Niya. Kung makakabuti sa atin ang isang bagay kagaya ng pagkain ng tama at pagsuko ng mga nakakalason lamang sa ating katawan at kaluluwa, mahirap man ito sa ating isipan ay magpatuloy tayo. Nagsisimula sa kagustuhan ng tao ang pagbabago dahil ang kahinaan ay kayang palakasin ng Diyos upang magtagupay.

Mga kapanalig, huwag na tayong lumingon sa mga nagpapabagal sa atin. Doon tayo sa magdadala sa atin ng mabuting hinaharap. Alagaan ang sarili at huwag hayaan ng lumiko ng landas. Iwasan ang mga taong masama ang impluwensya. May mga kayang magbigay ng saglit na kasiyahan ngunit panandalian lamang.

Manalangin tayo. Panginoon, wala kang nais magmula pa noong sinauna kundi ang ikabubuti namin. Inihahandog namin ang aming mga sarili sa Iyo. Palakasin nawa kami ng Iyong pag-ibig at nang ang kalooban namin ay maging matibay na labanan ang pumipigil sa amin na maging magiting para sa Iyo. Sa Ngalan ng Diyos Ama, Anak at Espiritu Santo. Amen.+

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com/

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Mateo 8, 18-22

Ang Mabuting Balita ng Panginoon ayon kay San Mateo

Noong panahong iyon, nang makita ni Hesus ang makapal na tao sa kanyang paligid, iniutos niya sa mga kasama na maghandang tumawid sa ibayo. Nilapitan siya ng isang eskriba at sinabi sa kanya, “Guro, susunod po ako sa inyo saan man kayo pumaroon?” Sumagot si Hesus: “May mga lungga ang mga asong-gubat, at may mga pugad ang mga ibon, ngunit ang Anak ng Tao’y wala man lamang matulugan o mapagpahingahan.” Isa naman sa mga alagad ang nagsabi sa kanya, “Panginoon, maaari po bang umuwi muna ako upang ipalibing ang aking ama?” Ngunit sinabi sa kanya ni Hesus, “Sumunod ka sa akin, at ipaubaya mo na sa mga patay ang paglilibing ng kanilang mga patay.”

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘
Mapagpalang Lunes. Saan nga ba ang lugar natin sa mundong ito? Marami tayong maaaring puntahan. binigyan tayo ng kalayaan na kumilos at manatili. Ngunit, mahalaga na huwag natin kalimutan na maaari natin piliin ang lugar kung saan matatagpuan ang kapayapaan. Maaari tayong lumayo sa lugar na pinagugulo ng kasalanan at hingin sa Diyos na makatagpo ng mga tao na maaaring magsilbing liwanag sa ating buhay.

Mga kapanalig, ang bawat desisyon natin ay maaaring isang hakbang patungo sa Diyos o palayo sa Kanya. Hilingin natin ang presensya ng Espiritu Santo at tanggapin ang hatid na gabay ng Diyos. Sa ating pagsuko ay may natatanggap tayong higit na mahalaga sa ating mga pinanghahawakan at kinatatakutan. Ang kapalit nito ay kapayapaan ng puso, isip at kaluluwa.

Manalangin tayo. Panginoon, nalalaman namin na ang landas ng buhay ay hindi puro kapatagan. Kung kaya’t nawa’y sa pamamagitan ng gabay ng Espiritu Santo ay maging handa kami at matibay sa mga baku-bakong daan. Panalangin namin na parating masumpungan ang kapayapaan, anuman ang aming pagdaanan. Sa Ngalan ng Diyos Ama, Anak at Espiritu Santo. Amen.+

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Mateo 5, 13-16

Ang Mabuting Balita ng Panginoon ayon kay San Mateo

Noong panahong iyon, sinabi ni Hesus sa kanyang mga alagad, “Kayo’y asin sa sanlibutan. Kung mawalan ng alat ang asin, paano pang mapananauli ang alat nito? Wala na itong kabuluhan, kaya’t itinatapon na lamang at niyayapakan ng mga tao.

“Kayo’y ilaw sa sanlibutan. Hindi maitatago ang isang lungsod na nakatayo sa ibabaw ng burol. Walang nagsisindi ng ilaw at naglalagay nito sa ilalim ng takalan. Sa halip ay inilalagay ito sa talagang patungan upang matanglawan ang lahat ng nasa bahay. Gayun din naman, dapat ninyong paliwanagin ang inyong ilaw sa harapan ng mga tao, upang makita nila ang inyong mabubuting gawa, at luwalhatiin ang inyong Amang nasa langit.”

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘

Mapagpalang Martes sa ating lahat. Ano nga ba ang halaga ng asin at bakit ito ginamit na halimbawa ng ating Panginoong HesuKristo sa Ebanghelyo? Ang asin ay ginagamit ng mga Hudyo sa tuwing sila ay nagsasakripisyo at nagsisindi ng insenso. Hindi lamang sa pagkain hinahalo ang asin. Maraming silbi ang asin at ito rin ang sinasabi ng Panginoon. May silbi tayo at may halaga. Lahat ng ating katangian ay itinakda sa atin kahit pa ang mga limitasyon at kahinaan. Kapag nagsikap tayong mapalapit sa Diyos ay unti-unting magiging malinaw ang dahilan kung bakit Niya tayo nilikha at kung saan magagamit ang ating mga kahinaan.

Mga kapanalig, lahat tayo ay may nakatakdang tungkulin. Huwag natin patagalin ang paghihintay ng Diyos. Kapag ginampanan natin ang ating misyon ay dun din tayo makakaranas ng kapahingahan. Suriin natin ang ating mga katangian, mga talento, mga interes at mga nakikitang pangangailangan sa paligid lalo na sa Simbahan na maaari natin tugunan. Hindi ito nagkataon lamang at tiyak na may mabuting gamit para sa ikauusad ng Kaharian ng Diyos.

Manalangin tayo. Panginoon, maraming salamat sa mga biyaya na mayroon ang aming pagkatao. Magkakaiba kami ngunit pare-parehong mahalaga. Nawa’y makita ito ng bawat-isa upang maitaboy ang inggit sa kapwa at kalungkutan. Nawa’y manatili kami sa buhay na puno ng pag-asa. Sa Ngalan ng Diyos Ama, Anak at Espiritu Santo. Amen.+

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Juan 19, 25-34

Ang Mabuting Balita ng Panginoon ayon kay San Juan

Noong panahong iyon: Nakatayo sa tabi ng krus ni Hesus ang kanyang ina at ang kapatid na babae nitong si Maria, na asawa ni Cleopas. Naroon din si Maria Magdalena. Nang makita ni Hesus ang kanyang ina, at ang minamahal niyang alagad sa tabi nito, kanyang sinabi, “Ginang, narito ang iyong anak!” At sinabi sa alagad, “Narito ang iyong ina!” Mula noon, siya’y pinatira ng alagad na ito sa kanyang bahay.

Alam ni Hesus na naganap na ang lahat ng bagay; at bilang katuparan ng Kasulatan ay sinabi niya, “Nauuhaw ako!” May isang mangkok doon na puno ng maasim na alak. Itinubog nila rito ang isang espongha, ikinabit sa sanga ng isopo at idiniit sa kanyang bibig. Nang masipsip ni Hesus ang alak ay kanyang sinabi, “Naganap na!” Iniyukayok niya ang kanyang ulo at nalagot ang kanyang hininga.

Noo’y Araw ng Paghahanda, at ayaw ng mga Judio na manatili sa krus ang mga bangkay sa Araw ng Pamamahinga sapagkat dakila raw ang araw ng Pamamahingang ito. Kaya’t hiniling nila kay Pilato na ipabali nito ang mga binti ng mga ipinako sa krus, at alisin doon ang mga bangkay. Naparoon nga ang mga kawal at binali ang mga binti ng dalawang ipinakong kasabay ni Hesus. Ngunit pagdating nila kay Hesus at makitang patay na siya, hindi na nila binali ang kanyang binti. Subalit inulos ng sibat ng isa sa mga kawal ang tagiliran ni Hesus, at biglang dumaloy ang dugo at tubig.

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘

Mapagpalang Paggunita sa Mahal na Birheng Maria, Ina ng Sambayanan. Ang paghahabilin ng ating Panginoong HesuKristo kay Maria sa apostol na si Juan ay hindi lamang nangangahulugan na pagbibilin. Sa totoo lang, mas kailangan natin ang tulong ni Maria kaysa ang tulong na kailangan niya sa atin. Tandaan ang mga sakripisyo na kanyang nagawa para sa misyon ng pagliligtas sa sangkatauhan. Lahat ng sakit na nasaksihan ni Maria ay nakaya niyang tiisin sa ngalan ng pagmamahal kay Hesus. Ngunit, tiyak nasa isipan din niya ang mga taong makasalanan na siyang dahilan ng pagpapapako sa Krus ni Hesus. Nang umakyat si Kristo sa langit ay iniwan pa rin niya si Maria hindi upang alagaan ng mga apostol kundi upang matuto sa kanya. Kagaya na lamang ng pagpapakita ni Maria kay Santiago sa Espanya nang panghinaan ito ng loob. Nasa Jerusalem noon si Maria ngunit sa kapangyarihan at pabor ng Diyos sa kanya at nagawa niyang dalawin at kausapin si Santiago na ipagpatuloy ang misyon sa Espanya. Kung hindi ito natuloy ay baka hindi nakinabang tayong mga Pilipino sa biyaya na ito dahil nagmula sa Espanya ang paglaganap ng Katolisismo sa ating bansa.

Mga kapanalig, kausapin natin si Maria bilang malapit na Ina. Nais niyang marinig maski ang pinakamaliit at hamak na detalye ng ating buhay. Iparinig natin kay Maria ang ating panaghoy kagaya ng pag-unga ng isang batang sanggol. Hindi ito matitiis ng Ina at tiyak na gagawan ng paraan upang mapatahan, mapahimbing at mapatawa.

Manalangin tayo. Panginoon, maraming salamat dahil hindi man perpekto ang mga nanay sa mundo, may isang Ina naman na hindi nagkukulang sa amin. Nawa’y lahat ng nanay ay mapalapit sa Inang Maria at tularana nawa nila gayun din kaming mga hindi nanay. Sa Ngalan ng Diyos Ama, Anak at Espiritu Santo. Amen.+

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com

Hunyo 08, 2025 | Linggo

Linggo ng Pentekostes (K)

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀

Juan 20, 19-23

Ang Mabuting Balita ng Panginoon ayon kay San Juan

Kinagabihan ng Linggo ding iyon, ang mga alagad ay nagkakatipon. Nakapinid ang mga pinto ng bahay na kanilang pinagtitipunan dahil sa takot nila sa mga Judio. Dumating si Hesus at tumayo sa gitna nila. “Sumainyo ang kapayapaan!” sabi niya. Pagkasabi nito, ipinakita niya ang kanyang mga kamay at ang kanyang tagiliran. Tuwang-tuwa ang mga alagad nang makita ang Panginoon. Sinabi na naman ni Hesus, “Sumainyo ang kapayapaan! Kung paanong sinugo ako ng Ama, gayon din naman, sinusugo ko kayo.” Pagkatapos, sila’y hiningahan niya at sinabi, “Tanggapin ninyo ang Espiritu Santo. Ang patawarin ninyo sa kanilang mga kasalanan ay pinatawad na nga; ang hindi ninyo patawarin ay hindi nga pinatawad.”

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘

Mapagpalang Linggo mga kapanalig. Ang Banal na Espiritu Santo ay ipinadala sa mga apostol. Ito ay katuparan sa pangako ng ating Panginoong HesuKristo. Hindi Niya tayo pinabayaan nang umakyat Siya sa Kaharian ng Diyos. Ang Espiritu Santo ang lumimlim sa ating Inang Maria upang ipagbuntis si Hesus. Ang Espiritu Santo ang nagdulot ng pagkabuhay muli ni Kristo. Kasama natin ang ikatlong persona ng Diyos. Marapat lamang na imbitahin natin Siya sa ating buhay. Hingin natin ang Kanyang gabay upang maging mas mabuti ang ating mga katangian. Halimbawa na lamang, humingi tayo ng kakayahan na umunawa. Minsan ang pakikinig ay parang paraan ng pang-unawa ngunit kung tinatanggap lamang natin ang naaayon sa ating kagustuhan, nakakaligtaan natin ang oportunidad na mas higit na umunawa.

Mga kapanalig, may mga regalo ang Espiritu Santo na maaari natin naranasan. Lahat ng ito ay makakatulong sa ating buhay patungo sa kabanalan. Hilingin natin na mas maging mabuti ang ating katangian bilang tao. Lumago nawa tayo sa Pag-ibig, Kagalakan, Kapayapaan, Pagpapasensya, Kagandahang-loob, Kabutihan, Katapatan, Kaamuan, at Pagtitimpi.

Manalangin tayo. Panginoon, salamat sa pagpapadala sa amin ng Espiritu Santo. Noon pa man ay naging mabuting gabay ng sangkatauhan ang Iyong Espiritu. Nawa'y manatili Siya sa amin at maging dulot ng pagbabago at kagalingan ng sanlibutan lalo na kami at aming mga kapamilya. Sa Ngalan ng Diyos Ama, Anak at Espiritu Santo. Amen.+

‌

𝐏𝐈𝐍𝐀𝐆𝐌𝐔𝐋𝐀𝐍: https://www.awitatpapuri.com

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Juan 17, 20-26

Ang Mabuting Balita ng Panginoon ayon kay San Juan

Noong panahong iyon, tumingala si Hesus at nanalangin, “Amang banal, hindi lamang ang aking mga alagad ang idinadalangin ko, kundi pati ang mga mananalig sa akin dahil sa kanilang pahayag. Maging isa nawa silang lahat, Ama. Kung paanong ikaw ay nasa akin at ako’y nasa iyo, gayun din naman, maging isa sila sa atin upang maniwala ang sanlibutan na ikaw ang nagsugo sa akin. Ang karangalang ibinigay mo sa akin ay ibinigay ko sa kanila upang sila’y ganap na maging isa, gaya nating iisa: ako’y nasa kanila at ikaw ay nasa akin, upang lubusan silang maging isa. At sa gayon, makikilala ng sanlibutan na sinugo mo ako, at sila’y iniibig mo katulad ng pag-ibig mo sa akin.”

“Ama, nais kong makasama sa aking kinaroroonan ang mga ibinigay mo sa akin, upang mamasdan nila ang karangalang bigay mo sa akin, sapagkat inibig mo na ako bago pa nilikha ang sanlibutan. Makatarungang Ama, hindi ka nakikilala ng sanlibutan, ngunit nakikilala kita; at nalalaman ng mga ibinigay mo sa akin na ikaw ang nagsugo sa akin. Ipinakilala kita sa kanila, at ipakikilala pa, upang ang pag-ibig mo sa akin ay sumapuso nila at ako nama’y sumakanila.”

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘

Mapagpalang Huwebes sa ating lahat. Nais ng ating Panginoong HesuKristo na magtamasa ang lahat ng tao ng kapayapaan. Ngunit hindi lang basta kapayapaan na panandalian bagkus ay iyong magtatagal. Makakamit ito ng bawat isa kung pagninilayan natin ang pag-ibig ng Diyos Ama sa sanlibutan. Tayo’y mga nagsisuway ngunit hindi pinaslang ng Maykapal. Bagkus lahat tayo ay pinagkalooban ng buhay at pagkakataon. Lahat tayo may regalo ng kakayahan at talento gaano man kaliit o kalaki ito. Walang anumang hadlang sa tao na maging banal, saan man ito mapadpad. Sapagka’t si Hesus na mismo ang nagsabi na nagawang maging tapat ng Kanyang mga apostol maliban sa isa na piniling sumuway. Ibig sabihin, anuman ang ating kasaysayan at kakayahan, sa huli tayo pa rin ang pipili kung gagawa tayo ng mabuti o hindi.

Mga kapanalig, alalahanin natin ang mga banal o mga santo sa Langit. Minsan din silang naglakad sa mundo na ating ginagalawan. Karamihan sa kanila ay hindi nakaabot sa teknolohiya na mayroon tayo ngayon. Subali’t nagawa nilang maging banal ayon sa kakayahan na mayroon sila gaano man kahirap ang sitwasyon. Sapagka’t ang pagdurusa sa mundo at ang pagtitiis dito ay hindi tunay na nakamamatay ng kaluluwa. Sa huli, ang mga tila nasaktan ng mundo, basta’t nanatiling tapat sa Diyos ay tiyak na makakapiling Niya sa Kaharian na walang kaguluhan at kapaitan.

Manalangin tayo. Panginoon, maraming salamat sa Iyong presensya sa aming buhay. Salamat sa mga banal na Iyong pinagpala. Dahil sa Iyong mga halimbawa ng grasya sa mga nakaraang panahon ay patuloy na nabubuhay sa pag-asa ang aming mga puso. Patuloy Mo nawang pagningasin sa katotohanan ang aming mga espiritung taglay nang manatili kaming tapat anuman ang limitasyon na aming kinahaharap. Sa Ngalan ng Diyos Ama, Anak at Espiritu Santo. Amen.+

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com

Hunyo 04, 2025 | Miyerkules

Miyerkules sa Ika-7 Linggo ng Pasko ng Pagkabuhay

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀

Juan 17, 11b-19

Ang Mabuting Balita ng Panginoon ayon kay San Juan

Noong panahong iyon, si Hesus ay tumingala sa langit, nanalangin at ang wika: “Amang banal, ingatan mo sila sa pamamagitan ng kapangyarihan ng iyong pangalan, pangalang ibinigay mo sa akin, upang sila’y maging isa, kung paanong tayo’y iisa. Habang kasama nila ako, iningatan ko sila sa pamamagitan ng kapangyarihan ng iyong pangalang ibinigay mo sa akin. Inalagaan ko sila at ni isa’y walang napahamak, liban sa taong humanap ng kanyang kapahamakan, upang matupad ang Kasulatan. Ngunit ngayon, ako’y papunta na sa iyo; at sinasabi ko ito habang ako’y nasa sanlibutan upang mapuspos sila ng aking kagalakan. Naibigay ko na sa kanila ang iyong salita; at kinapootan sila ng sanlibutan, sapagkat hindi na sila makasanlibutan, tulad kong hindi makasanlibutan. Hindi ko idinadalanging alisin mo sila sa sanlibutan, kundi iligtas mo sila sa Masama! Hindi sila makasanlibutan, tulad kong hindi makasanlibutan. Italaga mo sila sa pamamagitan ng katotohanan; ang salita mo’y katotohanan. Kung paanong sinugo mo ako sa sanlibutan, gayun din naman, sinusugo ko sila sa sanlibutan. At alang-alang sa kanila’y itinalaga ko ang aking sarili, upang maitalaga rin sila sa pamamagitan ng katotohanan.”

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘

Mapagpalang Miyerkules. Ang punot dulo ng ating buhay ay ang ating Panginoong HesuKristo. Siya ang daan, katotohanan at buhay. Walang sinuman ang makakarating sa Mapagmahal na Diyos Ama kundi sa pamamagitan ng Kanyang Anak. Ano ang ibig sabihin nito sa ating mga ordinaryong tao sa mundo? Kailangan natin tularan si Hesus. Tayo rin ay may misyon sa mundo na maging pari, propeta at hari. Hindi ito literal bagkus tumutukoy ito sa mabuting gawain na maaari natin iambag sa pag-usap ng Kaharian ng Diyos. Lahat ng tao ay nararapat na makarinig ng Salita ng Diyos, kagaya ng mga propeta ay maaari natin ipakilala na may Kristo, at ang paghahari ng Diyos ay totoong nakatira sa aking mga puso. May kakayahan ang bawat tao na mamuhay nang mabuti na ikararangal ng Diyos.

Mga kapanalig, may Kaharian na naghihintay sa atin. Matagal na tayong may tahanan kung saan walang namamahay na pasakit at pagdurusa. Ngunit, dahil sa kasalanan ay napahiwalay tayo sa kanlungan ng Diyos. Ngayon, habang tayo ay nasa lupa at may pagkakataon pa, gamitin ang ating kalakasan na maging buhay ang ating pananalangin at pagtanggap ng mga Sakramento kagaya ng pagkukumpisal. Makipag-ugnayan tayo palagi sa Diyos. Tanggapin natin itong realidad at paghahanda sa buhay na naghihintay sa atin sa Langit.

Manalangin tayo. Panginoon, maraming salamat sa pagparito ng Iyong Anak na si Hesus. Hanggang ngayon ay umaalingawngaw ang mga Salita na Kanyang binitawan sa lupa. Lahat ng Kanyang pangaral ay walang ibang dulot kundi ang mapalapit kami sa Iyo. Nawa’y magkaroon kami ng Espiritu ng katapangan na yakapin ang aming misyon saan man kami naroroon. Maging mabuting pari, propeta nawa kami upang maipalaganap ang paghahari Mo sa sanlibutan. Sa Ngalan ng Diyos Ama, Anak at Espiritu Santo. Amen.+

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Juan 16, 12-15

Ang Mabuting Balita ng Panginoon ayon kay San Juan

Noong panahong iyon, sinabi ni Hesus sa kanyang mga alagad: “Marami pa akong sasabihin sa inyo, ngunit hindi pa ninyo kayang unawain ngayon. Pagdating ng Espiritu ng katotohanan, tutulungan niya kayo upang maunawaan ninyo ang buong katotohanan. Sapagkat magsasalita siya hindi sa ganang kanyang sarili; sasabihin niya sa inyo ang kanyang narinig, at ipapahayag ang mga bagay na darating. Pararangalan niya ako, sapagkat sa akin magmumula ang ipapahayag niya sa inyo. Ang lahat ng sa Ama ay akin; kaya ko sinabing sa akin magmumula ang ipapahayag niya sa inyo.”

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘

Tayo ay papalapit na sa Dakilang Kapistahan ng Pag-akyat ng ating Panginoon sa Langit. At matapos ito, ang Linggong pagkatapos nitong pagdiriwang, ay ang Dakilang Kapistahan ng Linggo ng Pentekostes. Kaya pinaghahandaan tayo ng ating liturhiya para sa nalalapit na pagtatapos ng Panahon ng Pasko ng Muling Pagkabuhay. Si Hesus na namatay sa Krus, ngunit muling nabuhay, ay nakatakdang tapusin ang kanyang misyon sa lupa. At alam niya ay babalik na siya sa Amang nagsugo sa kanya. Kaya makikita natin sa mga Ebanghelyo ang kanyang mga huling habilin bago siya lumisan sa mundong ito pauwi sa kalangitang kanyang tahanan. At ito’y nararapat upang tayo rin ay makasigurado na kapiling niya tayo, at mayroon siyang nakahandang isang magandang paninirahan upang makamtan natin ang buhay na walang hanggan. Kaya patuloy ang paalala ni Hesus sa Ebanghelyo tungkol sa biyaya ng Espiritu Santo. Ang lahat ng kanyang sinasabi ay hindi niya maipahayag, kaya ipinangako niya sa kanyang mga alagad na ipapadala niya ang Espiritu Santong magsisilbing Patnubay upang mas maunawaan ang kanyang mga salita. At ang Espiritu rin sa ating buhay-pananampalataya ay may pitong kaloob upang tayo ay mabigyan ng kakahayang tahakin ang landas ng buhay ng may pananampalataya at katapatan sa Diyos. Kaya si San Pablo sa Unang Pagbasa ay masasabi natin isang matapang na saksi na puno ng Espiritu Santo upang ipahayag ang Mabuting Balita ni Kristo sa mga Hudyo at Hentil. At narinig natin ang kanyang pangangaral sa bayan ng Atenas, kung saan itinuwid niya ang pamumuhay ng mga Kristiyanong komunidad roon na sumasamba sa “diyos na hindi nakikilala” patungo sa tunay na Diyos nating Ama. Ito ang papel ng Espiritu Santo sa ating buhay bilang Patnubay, upang mas kilalanin pa natin ang Diyos. At siya’y nagpapatotoo sa ating tungkol sa katotohanang mahal tayo ng Panginoon. Kaya ang hamon sa atin ay mamuhay sa katotohanan at kabutihan, na alam natin ang Espiritu ang patuloy na gagabay sa atin upang maramdaman natin palagi ang presensiya ng Panginoon.

Pagninilay ni Reynald Perez mula sa Awit at Papuri

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com

Mayo 27, 2025 | Martes

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Juan 16, 5-11

Ang Mabuting Balita ng Panginoon ayon kay San Juan

Noong panahong iyon, sinabi ni Hesus sa kanyang mga alagad: “Ngayo’y paroroon na ako sa nagsugo sa akin. Wala isa man sa inyong nagtatanong sa akin kung saan ako pupunta. At ngayong sabihin ko sa inyo, natigib kayo ng kalungkutan. Ngunit dapat ninyong malaman ang katotohanan: ang pag-alis ko’y sa ikabubuti ninyo, sapagkat hindi paparito sa inyo ang Patnubay kung hindi ako aalis. Ngunit kung umalis ako, susuguin ko siya sa inyo. Pagdating niya ay kanyang patutunayan sa mga tao sa sanlibutan na mali ang pagkakakilala nila sa kasalanan, at ipakikilala niya kung ano ang matuwid, at kung ano ang kahatulan. Mali sila tungkol sa kasalanan, sapagkat hindi sila nanalig sa akin; tungkol sa matuwid, sapagkat ako’y paroroon sa Ama at hindi na ninyo makikita; tungkol sa kahatulan, sapagkat hinatulan na ang pinuno ng sanlibutang ito.”

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘

Habang tayo’y papalapit sa katapusan ng Pasko ng Muling Pagkabuhay, ang Ebanghelyo ngayon ay bahagi ng mga diskurso ni Hesus bago siyang umakyat papuntang langit. Nangyari ito bago pa man maganap ang kanyang Misteryong Paskwal noong gabi nang siya’y nasa Huling Hapunan kasama ang 12 Apostol. Narinig natin kahapon kung paano plinano ni Hesus na suguin ang Espiritu Santo upang maging Tagapagtanggol nila. Ngayon ay tila inuulit niya ang pahayag ng pagsusugo ng Tagapagtanggol, ang Espiritu, upang maging gabay ng mga alagad sa kanilang misyon. Ang Espiritu ang tanging maghuhubog sa ating pagkatao upang makilala natin ang tama at mali ayon sa pamantayan ng Panginoon, at hindi sa mundo. Marahil ay dinidikta tayo ng tao o kaya ng isang grupo na namnamin ang isang bagay na akala natin ito’y mabuti. Subalit di lingid sa ating kaalaman na tayo’y tinutukso na gumawa ng masama. Kaya uso ngayon ang sinasabing sumunod sa “good influence”, at huwag sa “bad influence”. Ang Espiritu Santo ay ang “great influence” sapagkat siya ang magpapahayag sa atin ang dakilang kalooban ng Ama ayon sa Mabuting Balita ni Hesukristo. Kung bubuksan lang natin ang ating puso sa kalooban ng Panginoon ay matatanggap pa natin ang mga biyayang nararapat sa atin ayon sa kanyang pamantayan. Makikita natin sa Unang Pagbasa ang katatagan nina Pablo at Silas nang sila’y ipinaghagupit at tsaka ipinakulong. Habang sila’y umaawit ng mga imno, biglang nagkalindol at nawasak ang bawat selda. Akalain ng bantay na guwardiya na nakatakas ang mga bilanggo, kaya tinangka niyang magpakamatay. Subalit nagpakita sa kanya sina Pablo, Silas, at ang lahat ng bilanggo. Nagtanong ang guwardiya kung paano niyang makakamtan ang kaligtasan, at tugon ni Pablo na siya’y sumampalataya sa ating Panginoong Hesukristo. Nawa’y patuloy tayo’y maging matatag sa ating pananampalataya sa Panginoon sa tulong ng Espiritu Santo.

Pagninilay ni Reynald Perez mula sa Awit at Papuri

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Juan 14, 23-29

Ang Mabuting Balita ng Panginoon ayon kay San Juan

Noong panahong iyon: Sinabi ni Hesus sa kanyang mga alagad, “Ang umiibig sa akin ay tutupad ng aking salita; iibigin siya ng aking Ama, at kami’y sasakanya at mananahan sa kanya. Ang hindi umiibig sa akin ay hindi tumutupad sa aking mga salita. Hindi akin ang salitang narinig ninyo, kundi sa Amang nagsugo sa akin.

“Sinabi ko sa inyo ang mga bagay na ito samantalang kasama pa ninyo ako. Ngunit ang Patnubay, ang Espiritu Santo na susuguin ng Ama sa pangalan ko, ang siyang magtuturo sa inyo ng lahat ng bagay at magpapaalaala ng lahat ng sinabi ko sa inyo.

“Kapayapaan ang iniiwan ko sa inyo. Ang aking kapayapaan ang ibinibigay ko sa inyo; hindi ito katulad ng ibinibigay ng sanlibutan. Huwag kayong mabalisa; huwag kayong matakot. Sinabi ko na sa inyo, ‘Ako’y aalis, ngunit babalik ako.’ Kung iniibig ninyo ako, ikagagalak ninyo ang pagpunta ko sa Ama, sapagkat dakila ang Ama kaysa sa akin. Sinasabi ko na ito sa inyo bago pa mangyari upang, kung mangyari na, kayo’y manalig sa akin.

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘

Mapagpalang Linggo sa ating lahat. Ang mensahe ng Ebanghelyo sa araw na ito ay ang gawin natin ang mga mahalaga at ang kailangan lamang. Marahil marami tayong naiisip na dapat gawin. Sa unang tingin ay madaling maisip na lahat ng ito ay mahalaga. Ngunit, sa isip pa lamang ay tila mahirap nang pagsabay-sabayin. Alalahanin natin ang habilin ng mga apostol sa Unang Pagbasa, na pasanin lamang ang kung ano ang tunay na mahalaga. Ang layunin ng ating pananampalataya ay ang mapalapit sa ating Panginoong HesuKristo, ang mas makilala ang Diyos at mas mapalapit ang puso natin sa Kanya. Hindi natin makakamit ito kung napababayaan na natin ang ating sarili, kung naisasakripisyo ang oras sa walang kabuluhan, at kung nawawala na ang ating buhay panalangin.

Mga kapanalig, sinabi ng santo na si Padre Pio, na ipinagdiriwang natin ang kaarawan sa araw na ito, na walang giyera na mapagtatagumpayan nang walang panalangin at tayo ang pipili kung nanaisin ba natin na magtagumpay. Mangyayari lamang ito kung magsisikap tayong alalahanin ang Diyos sa bawat tagpo ng ating buhay. Walang ibang simple at epektibong paraan na gawin ito kundi ang pagsasanay na manahimik at manalangin. Sa saglit na minuto ay maaari na natin mapasalamatan at mas makilala ang Diyos. Kaya huwag natin maliitin ang mga munting pagkakataon na ito.

Manalangin tayo. Panginoon, maraming salamat sa Iyong patuloy na paalala sa amin na narito Ka. Nawa’y pagkalooban Mo kami ng grasya na maging alerto sa mga pagkakataon na maaari namin ilaan sa katahimikan at pananalangin. Hiling namin na mas makilala ang puso ng Iyong Anak na si Hesus. Sa Ngalan ng Diyos Ama, Anak at Espiritu Santo. Amen.+

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com

Mayo 22, 2025 | Huwebes

𝐌𝐀𝐁𝐔𝐓𝐈𝐍𝐆 𝐁𝐀𝐋𝐈𝐓𝐀
Juan 15, 9-11

Ang Mabuting Balita ng Panginoon ayon kay San Juan

Noong panahong iyon, sinabi ni Hesus sa kanyang mga alagad: “Kung paanong iniibig ako ng Ama, gayun din naman, iniibig ko kayo; manatili kayo sa aking pag-ibig. Kung tinutupad ninyo ang aking mga utos, mananatili kayo sa aking pag-ibig; tulad ko, tinutupad ko ang mga utos ng aking Ama at ako’y nananatili sa kanyang pag-ibig.

“Sinasabi ko sa inyo ang mga bagay na ito upang makahati kayo sa kagalakan ko at malubos ang inyong kagalakan.”

Ang Mabuting Balita ng Panginoon.

𝐏𝐀𝐆𝐍𝐈𝐍𝐈𝐋𝐀𝐘

Mapagpalang Huwebes sa ating lahat. Kailangan na manatili sa ating puso ang ating Panginoong HesuKristo. Nais ng Diyos na lubos nating maranasan ang pag-ibig Niya sa atin. Ito ay klase ng pag-ibig na hindi makasarili, hindi nakakapanakal, hindi madamot, at hindi nakakasakit. Ang buhay ng tao na umiikot sa mga Salita ng Diyos ay nagagabayan at nagiging malayo sa kapahamakan na dulot ng kasalanan. Dahil wala itong kapayapaan na dala. Marapat lamang na mabuhay tayo nang matuwid at malinis ang konsensya. Kailangan na matuto tayong bitawan ang mga hindi magandang bagay sa ating buhay.

Mga kapanalig, huwag natin paghintayin ang Diyos. Tumalima tayo sa Kanya at manalangin. Maaari tayong magmakaawa at humingi ng grasya upang maputol ang mga tanikala na naggagapos sa atin. Kasama na rito ang mga mumunting kasalanan na nagdudulot ng kawalan ng kapayapaan sa ating buhay. Kagaya na lamang ng paniniwala sa mga pamahiin at iba pa. Lahat tayo ay may karapatan na mamuhay na konektado sa Diyos. Mamuhay tayong hindi natatakot sa mga sabi-sabi bagkus sa Panginoong HesuKristo.

Manalangin tayo. Panginoon, pagkalooban Mo kami ng paghahangad pang mas lalo na mapalapit sa Iyo. Nawa’y maging mas malapit kami sa Iyo at sa patuloy naming pagsunod sa Iyo, nawa’y ituring Mo kaming mga tunay na kaibigan. Sa Ngalan ng Diyos Ama, Anak at Espiritu Santo. Amen.+

𝐏𝐈𝐍𝐀𝐆𝐌𝐔𝐋𝐀𝐍:

https://www.awitatpapuri.com